حقيقة ارتباطي بالشرفة بركات

الاعزاء ابناء الحبيبة الشرفة بركات هذه الارض التي عشقناها وافردنا لها مساحات من الود في دواخلنا بسبب ما لقينه من انسانها الطيب المضياف ومن ابناءها الذين يحبونك لا شئ سوى انك انسان ويحبون الشرفة كما لا يحبون سواها فقد تعلمنا منهم الكثير وصاروا لنا اخواناً اكثر من اشقاء والقائمة تطول وتطول ولا اظن الصفحات تتسع لتفي الرائعون حقهم
اليوم احكي لكم قصة معرفتي بالشرفة وهذه العلاقة الضاربة في الجزور والقدم وكنت قد انزلتها في بوست باسم بساطة الشعب السوداني وهو سلسلة كتابية بالدارجة احكي فيه بساطة انسان السودن والقيم الفاضلة التي توارثناها كابراً عن كابر والبوست موجود بمنديات ابناء سنار على الانترنت وبحمد الله هو واحد من انجع البوستات على المنتدى وبه مداخلات قيمة ، وقد انزلت قصتي بالشرفة في هذا البوست لاحكي للناس بساطة وطيبة اهل هذه المدينة الجميلة الشرفة بركات واليكم الموضوع كاملاً دون تغير او تبديل

المرة دي انقلكم لتجربة انا عشتها شخصياً مع ناس بسطاء الى ابعد ما تتصور ديل اهلنا ناس الشرفة بركات هذه القرية الكبيرة جداً والراقدة على الضفة الشرقية للنيل الازرق قبالة قرية فداسي الحليماب والواقعة على ارض البطانة حيث توجد معدية ( مراكب ) بينها وقرية القريقريب .
صلتي باهل هذه القرية بداءت في عام 1995 حيث قبلت حينها للدراسة بجامعة امدرمان الاهلية وكنتا ساكن مع شقيقتي الكبيرة في منطقة السجانة بالخرطوم وبدور على سكن مع شباب طلبة في الجامعة ، وكان وكتها عندي شقيقة في الجامعة في السنة الاخيرة وعندها زميل من الشرفة اسمو ( معز الحاج ) الله يطراه بالخير هو الان في الرياض وهو من دلاني على السكن معاهم واللهم مجموعة من ابناء الشرفة مستاجرين منزل من غرفتين في منطقة بانت شرق جوار منزل المرحوم رجل البر والاحسان ابو عبيدة حجوج ، ومشيت معاهو عشان اتعرف على الشباب فتحنا باب الحوش واول زول شفتو اسمو قيصر محمد سعد قال لمعز وين يا ملح ( لقب معز ) ودا شنو العربي الجبتو معاك دا هاهاها ، انا استغربتا الزول دا بيعرفني من وين عشان اهظر معاي كدا ، معز ضحك وقال لي دي المناظر الفيلم لسة قدام دخلتا وسلمتا علي الشباب ( عمار الماحي ، رافع يوسف القمير ، يوسف عبد الله الطاهر ، عبد الإلاه عبد الله الطاهر ، عمار محمد نور ( من ودراوه ) الصادق صديق علي وقيصر محمد سعد ) هولاء كانوا الرفقة بالسكن الجديد اول من تحدث معاي الصادق وكان رجل ضخم ملي الجثة قال لي هوي يا عربي نحنا كلنا عرب ساااي ناس بهايم ما تشوف الجينز والاقمصة دي والله شبعنا في الويكاب والكسرة لمن قربنا نولع
والجماعة يضحكوا قام عمار الماحي قال لقيصر امسك العربي دا انديهو جلدة عشان يفك شوية من كشتو دي ( اخدتا علقة من الشباب عمري ما نساها وكانت ترحيب جميل من اخوان عزاز كسروا بيها حاجز الجمود الكان مسيطر علي وحسيت اني بعرف الناس دي من عشرة سنين شوفوا الناس بتدخل في بعض كيف وترحب بي كل واحد معاها دون اي ضغاين ولا حسد او كره .
من يوما بقيت الساكن رقم 10 في البيت واتضح انو ( رافع وقيصر ويوسف معاي في نفس الدفعة ونفس المدرج )
من هنا بداءت حكاية ارتباطي بالشرفة لانو كان كل اولاد الشرفة بيجوا عندنا في البيت ويقعدوا معانا ونسمع منهم عن حكاوي اهلنا في الشرفة لدرجة اني اتمنيت ازورها واقابل الناس السمعتا عنهم ، المهم دارت الايام والصداقة بينا امتدت الى ابعد مكان
وجاء عيد الاضحي فسافرنا الجزيرة للعيد وقبل السفر وجهوا لي دعوة لزيارة الشرفة في العيد لانو يوسف ( ود الشيخ ) عندو عرس خالو وقلتا ليهم انشاء الله ، كانت عندي رغبة ملحة ازور الشرفة من شدة ما سمعتا عن بساطة ناسا والالفة العايشين فيها
المهم جاء العيد وثالث يوم قررتا السفر الى الشرفة ركبتا من بورتبيل الى مدني ومن موقف الشرفة جنب الملجة ركبتا بص اوستن وانا بركب البص اتذكرتا انو قيصر قال لي البص دا بتاع عمو وصلتا الشرفة ونزلتا في السوق حسب الوصف الانا عارفو وحافظو انو بيت ناس معز جنب السوق والعلامة البارزة العامود رقم 166 ودا المكان البيجتمعوا فيه الاخوان بعد المغرب يتونسوا ومشهور بحجر جعفر العاول انا مابعرفوا لكن سمعتا عنو لانو كان زول نكتة ، اها بديت افتش علي العامود
وما سالتا اي زول لحدي ما لقيتو وفعلاً نفس الوصف بتاع المكان حجر كبير ومجموعة حجار صغيرة جنبه وكان في شاب نحيل قاعد في الضل وانا ماشي عليهو قعد يعاين لي شديد وصلتوا وقبل ما اسلم عليه قلتا ليه والله ياجعفر حجرك دا ما بتخليهو ولاحظ انا ما بعرف جعفر ولا هو بعرفني ، ردا علي وقال والله قوة عينك دي الا كان انتا مزمل بورتبيل ، والله الزول دا خشى فيني حضن اتقول بيعرفني من سنين ودا كلوا بس من الحكاوي السمعا عني من الشباب ، وقال والله الليلة الشرفة خشاها تمساح ، اها عنقريبك العندو كراعين حق الضيوف في بيت بانت قاعد هاهاها ضحكنا وحلف علي لازم اخش اسلم علي ناس البيت وانا مصر خلاص بجيكم بعدين

بعدين ما فاضيين ليك امي دايرة تعوس وابوي داير يلعب ضمنة هاهاها ، المهم دخلتا وسلمتا علي ناس البيت وعرفني عليهم دا مزمل عربي ساااااي جابوا الدرب من بورتبيل زول بصل ، ومشى معاي لناس معز لقينا معز وقيصر مع بعض واتفاجاوا بي شديد ورحبوا بي وسلمتا علي ناس البيت والغريبة لقيتم كلهم بيعرفوا مزمل بورتبيل قبل ما يشوفوه وكل واحد حافظ لي موقف ونكتة انا عملتها .
في مساء نفس اليوم بداءت رحلة الزيارات للاصدقاء في بيوتم والله دي انا عانيت فيها جنس معاناة اي بيت نخشو لازم اما بيبسي او شاي لبن لمن الواحد حسا انو بقي زي السيرمس وما قادر امشي واذا رفضتا تشرب دي نبزة لناس البيت الاب والام والاخوان والصغار يازول والله تشرب ويمسكووك الكباية غصب والشباب المعاي يضحكوا المهم لحدي الساعة تمانية مساء رجعنا لديوان عمنا ( محمد الشيخ ) خال معز والكنا نازلين فيهو ومعاي الشباب ، ولدو اسمو معاوية بيشتغل ممرض راجل لذيذ جداً انا قابلتو في بيت بانت مرة واحدة ، لما جينا الديوان انا كنتا خلاص حاسي انو بطني حا تطق من الشاي واللقيمات والبسكويت بقيت زي غنماية الحلة واخر شي بفكر فيهو اني انوم ، اها معاوية قال لينا يا جماعة انتو وين انا من قبيل مستنيكم بالشاي واللقيمات ، انا سمعتا الكلام دا وقربتا اجن شاي شنو يازول حرم ولا بقة خلاص واقف تتق ، والله انشاء الله تنقدا تشرب تشرب والله ما تشرب الا امسحك بيهو انت قايلة لعب اسي ارجع الشاي بيغادي امي تكبوا لي فوق راسي ، ومسكوني بالقوة ( قيصر ومعز ورافع وود الشيخ والشيخ اخو معاوية الصغير ومعاوية بشرب فيني الشاي ويدخل اللقيمات في خشمي بالقوة وانا اصرخ وفلتا منهم وقمتا جاري والله الشيخ ومعاوية سكوني باللقيمات لحدي الشارع ، في الباب لاقانا ابوهم ( محمد الشيخ ) وقال يا اولاد الضيف ساكنو خباركم ردا معاوية الضيف ابى ياكل اللقيمات واشرب الشاي ردا ابوهم هي نان انتو زاتكم غلطانين اكان اول حاجة تكتفوه وبعدين تاكلوا امسكوهو انكتفو وجيبو الشاي والله انا من الضحك وقعتا في الارض قرب يغمى علي والغريبة الراجل ما كان بيهظر جااااااادي ، والله كان يوم وكانت ليلة ما انساها حياتي كلها
استمرت المعاناة في اليوم التاني الفطور مع عمار الماحي وتاكل رجالة ، الغداء عن اخونا وزميلنا ازهري جابر حسن وتاكل غصباً عنك وشاي المغرب عند ناس الصادق صديق واحمد صديق علي وهنا انا شربتا كباية واحدة ورفضتا ازيدا والغريبة مافي زول اصرا علي ، قام احمد صديق ختا الكباية وقال عن ازنكم مشا البيت وبعد لحظة رجع ومعاهو اخوه الكبير اسمو الواثق راجل ضخم ولذيذ جداً دخل علينا في الصالون وقبل ما يسلم قال وينو العربي الابا يشرب الشاي دا الصادق قال ليه يا هو دا انا خفتا يا ربي دا شنو دا الراجل جاء جنبي وقال لي اسمع تشرب ولا اقعد فوق ليك اسفلتك علي الطلاق ما تشرب الا اوريك ، اخوك من الخوفة شربتا باقي الصبارة كلها والواثق يكب لي ويضحك والشباب ماتوا من الضحك .
وكذلك في اليوم الثالث وكل يوم اقول انا مسافر يجيبوا لي واحد يحلف طلاق قعدتا معاهم خمسة ايام وحضرتا فيها اربعة مناسبات زواج واتحننتا مع كل العرسان ورقصتا في كل الحفلات رجالة ، وفي اليوم الداير اسافر فيهو قلتا الناس ديل ما بيخلوني اسافر الا افاجم بنفس طريقتم اها عملتا شنو مشيت لواحد اسمو غاندي علي المهدي ود عم قيصر متزوج وقلتا ليه والله يا غاندي مافي طريقة تفكني الا تحلف انتا طلاق اني انا امشي عشان الناس دي تفكني وبعد الحاح وافق الراجل وحلف على الشباب انهم يفكوني قام عندنا صاحبنا اسمو خالد محمد الحسن قال نحنا موافقين نخليهو يمشي لكن بشرط نحننو حنة كاملة ايديهو ورجليهو وخشينا في موضوع تاني وجرجرة المهم انا وافقتا اتحننا لكن في ايديني بس وقد كان عملوا لي حنة ببارتي وعزموا اصحابنا كلهم زيها وزي حنة العريس اها هنا دخل جعفر العاول وحلف الا يحلقوا لي شعري وجابوا قيصر لانو كان حلاق ماهر وحلقوا لي وبعد الفطور اتلملموا كل الاصحاب اكتر من عشرين شاب في وداعي لما وصلنا موقف المواصلات الناس قايلاها مظاهرة لمن انا زاتي اتخلعتا واكتر من عشرة دفعوا لي وبتاع البوكس حلف ما يشيل من واحد ريال طلع معرفة

هكذا انت دوماً نصباً سرمديا ورقماً صعب التجاوز اخي مزمل

والله يا الحبيب
رجعتنى للزمن الجميل
ناس أخوان فاطنه ناس حااااره جد جد

عليك الله
الشرفه وناسه مش سمحييييين ؟
خلاص كلم مدثر ؟؟؟
هع هع هع

زائر

ده من اصل طيبك ومشكور جدا

مروان عبدالباقى كتب:: هكذا انت دوماً نصباً سرمديا ورقماً صعب التجاوز اخي مزمل

وهكذا انتم دوماً اخي مروان طاهرون طُهر الضوء في الزمن الهُلام
تهدون الناس سبل الرشاد اليكم لانكم كما النجوم بها يهتدي الناس
تتالقون في ظلمات الليل البهيم وتسامرون هداءة الاحلام لانكم باختصار ابناء الشرفة بركات وما دونكم لا يطول ثناءكم
دمتم كما عهدناكم كنيران الخلاوى لا تنطفى ابداً ولكم كل الحب

ودالمطامير كتب:: عليك الله
الشرفه وناسه مش سمحييييين ؟
خلاص كلم مدثر ؟؟؟
هع هع هع

والله يا ود المطامير اسمح منكم لا شافت عين ولا سمعت اذن واكرم منكم واطيب منكم لسا ما اظنو اتوجد
ومدثر والله يكن لكم من الود اكثر ما اكنه انا لكم وما محتاج بس اظنو بناكف فيك عشان الصحبة وكدا
وبرضو هع هع هع

محمد الزين على صديق كتب:: ده من اصل طيبك ومشكور جدا

العزيز محمد الزين والله دا واجبنا الفرضتو علينا الحياة اننا نقابل الكرم بالشكر وانتو اهل الكرم لي حدو والحق يقال لانكم اهل لك ما هو جميل ورائع وتستحقون اكثر من الثناء والشكر
لك خالص مودتي محمد الزين

الاخ مزمل
لك الشكر وانت تحمل تحكي عن الشرفه في منتديات سنار
ان دل هذا انما يدل علي طيبه قلبك انت ونحن نعرف كل من زكرتهم
هم اهل كرم لكنهم ارادو ان بردو جزء من جمايلك
لكن عندي سؤال انت قلت اول ماجيت بيت بانت دقوك كدي ركز

طه عبدالله الخضر كتب:: الاخ مزمل
لك الشكر وانت تحمل تحكي عن الشرفه في منتديات سنار
ان دل هذا انما يدل علي طيبه قلبك انت ونحن نعرف كل من زكرتهم
هم اهل كرم لكنهم ارادو ان بردو جزء من جمايلك
لكن عندي سؤال انت قلت اول ماجيت بيت بانت دقوك كدي ركز

هاهاهاهاهاهاهاها
تاني يا الكلس ، طه طه طه اقعد سااااااااااااااااااي
ما تخليها احسن كدي غايتو الاجابة انا ما عندي ممكن تسال قيصر ولا رافع وعلي العموم ابرد ليك حشاك شوية ( القلم بتاع التوقيع شالو عفش ود العزازة اسالوا هاهاهاهاهاهاها )
لك مودتي الكلس ود الناس العزاز طه والتحايا للاسرة بحي العمدة ودلوت

يازول يارائع ياعملة نادرة في هذا الزمن الأشتر ياجنيه ياذهب
انت الطيبة والأصالة حقيقة الناس حلوة بيك لأنك حقاني وصاحب مبادئ
وما كلو زول بقول الكلام ده الا لأنه انت -انت
لك التحية ودخلت بيتنا من غير نسمع بيك ولا حتي نحلف عليك
لكن أقول مصيرو الحي إلاقيك

مزمل بورتبيل كتب:

ودالمطامير كتب:: عليك الله
الشرفه وناسه مش سمحييييين ؟
خلاص كلم مدثر ؟؟؟
هع هع هع

والله يا ود المطامير اسمح منكم لا شافت عين ولا سمعت اذن واكرم منكم واطيب منكم لسا ما اظنو اتوجد
ومدثر والله يكن لكم من الود اكثر ما اكنه انا لكم وما محتاج بس اظنو بناكف فيك عشان الصحبة وكدا
وبرضو هع هع هع

حبيب قلبى
بالجد أنا منك ومن ( مدثر ) عرفت ناس الحب من القلب للقلب
ناس يدخلوا القلب من أول وهله

ش

علي صديق علي الصديق كتب:: يازول يارائع ياعملة نادرة في هذا الزمن الأشتر ياجنيه ياذهب
انت الطيبة والأصالة حقيقة الناس حلوة بيك لأنك حقاني وصاحب مبادئ
وما كلو زول بقول الكلام ده الا لأنه انت -انت
لك التحية ودخلت بيتنا من غير نسمع بيك ولا حتي نحلف عليك
لكن أقول مصيرو الحي إلاقيك

الغالي علي صديق علي مشكور على طيب كلامك ودا والله من اصلك وما غريب عليك اذا كنتا انت اخ لاصحاب عزاز علي جداً احمد صديق والصادق والواثق اكن ليهم كل تقدير وامكن الظروف ما سمحت لينا نقابلك في بيتكم لكن الواثق قام بالواجب ربنا يديه العافية
التحايا عبرك للاخوان احمد والصادق والواثق وربنا يديم المحبة بينا ومشكورين علي شاي اللبن المقنن والله طعمو لي هسا في خشمي وهرشة الواثق موقفة قلبي
ههههههههههههههههههههههههههههه ربنا يديكم العافية ومشكورين

ودالمطامير كتب:

مزمل بورتبيل كتب:

ودالمطامير كتب:: عليك الله
الشرفه وناسه مش سمحييييين ؟
خلاص كلم مدثر ؟؟؟
هع هع هع

والله يا ود المطامير اسمح منكم لا شافت عين ولا سمعت اذن واكرم منكم واطيب منكم لسا ما اظنو اتوجد
ومدثر والله يكن لكم من الود اكثر ما اكنه انا لكم وما محتاج بس اظنو بناكف فيك عشان الصحبة وكدا
وبرضو هع هع هع

حبيب قلبى
بالجد أنا منك ومن ( مدثر ) عرفت ناس الحب من القلب للقلب
ناس يدخلوا القلب من أول وهله

والله اخجلت تواضعي يا راجل يا راقي دا والله من طيب اصلك ربنا يديم بينا الصلات الطيبة ويديكم الف عاقية
وانتوا كمان خشيتو القلب دون استئذان لانكم اكتر من رائعيين

» أراضي سكنية بالشرفة
» الشرفة بركات
» في رثاء الشريف بركات
» الشرفه بركات ... مجرد همسه بس
» توقيع على اسفيريات الشرفة بركات