جقلة ود البنا-إهداء خاص للإخوه ود المطاميرو الأخ محمد الزين ود من الله لحسن المتابعة

سربت جوه في الجوف نـار غُناها وبقَّت
وبتقنَّت فحلها البي القُـــــلاده مهقَّت
بطُمس القلب عتيم جقله إن حلبتو وصقَّط
تحته حواره يالليل بالمقص مــا إنعقَّت

رِد الحي مقاشراهو المقولب أباطه
دايره بطــانه تتهرتم تحته وطاطه
لي رزمي البروق أُمات تَكيك صناطه
شمَّت ريح دعاشها وصنقعت تتناطه

بتســـادِر بعيـــد بالرِده ما بتتكل
أُم صَدَفاَ بِزيل قرم القُطــــامي الثكَّل
وفوقه مَسلَّج البعد الصـــريمه مَشَكَّل
مُصاعو كَدوبه مدفوق فوق قفاهو كَعكَّل

سيدك ديمه بستعزى وبيطرى بخيته
وخزنة جيمك اللعسر ملوهو شريطه
رِعت قفر الجِزو وعمرت رِبت سنكيته
شــوال تــاجر الغرب المعبا بغيته

يوم متشعلقه الفرَّاع وضـاربه الخُن
ومن حبشتها جابت فوق عُرُفها البُن
حِس طنوبه في قرعتها زُن زُن زُن
بِتقطَّع لبن مُرباعها نـــافشة غُن

يوم عُقداها طربــــانين فراحه يهويتو
ويوم بتسادِر الوعر المكــــاجره يويتو
يوم مقروعه فوق تَب صافيه نقعت مويتو
يوم حازمها كِير راش بولو فـوق هبويتو

سِعاية أولاد ملوك كان تلقى واحداً هيِّت
والبِحَمَل أذاك يالعــاديه دود مو عبيِّط
يوم طَلَق الزرارات أُم جُراب مـو بسيِّط
هِبير سيفه سبعه أيـــام حكيمو يخيِّت

جقله بتقطع المَحَل الغبــاشو مشيِّط
ديمه مِعينه البرق السحـــابو مبيِّت
ظرفها ببِسدَح القاصدو ومسافه يعيِّط
كل ما تحِن وترزم ترمي فـارس ميِّت

البلى فيكي يالشنقه الطويله أُم شُوشه
والبلى فيكي يالرِقِك مِقاشر الحُــوشه
البلى فيكي يالفيكي الرجـال مغشوشه
مون عارفين كُماجك مُر بِسوي الدوشه

فيهـا الخلفه فيهـا الداره فيها الحــايل
فيها بنــات لِبِن رِق والبُكــار وشوايل
مِرابعه الصيد وضاربه عسين وراده نسايل
جقله مكمله الفرســـــان وفاتنه قبايل

مراتن تحيِّر راشــــده الداريــها
ومراتن تخِب تـــابعه البِزيم بكريها
مراتن عجوف عادمه اللحم في سريها
ومراتن ردوف دارجه وبِحِن بــاريها

الرزَّامــه حنَّت دايره سدر الغُر
تطاردبو المفرَّق وفي جناها تدُر
جقله معزة الدعجه الوضيبه بِجُر
ضايق فيك حمدمالله الكُماج المُر

يالصمدك مشربت بالهويــده ولاف
عَـنَّاية بعيـــد ما بهددوك بجفاف
أُمحمد ود حمدمالله الطبـايعو عُفاف
دافِع فيك كمين شُوح مَسارعو خُفاف

هنية المهَّدِك من شُوحو رابطك مارسِك
وأتمقنعتي حررتي البعاين حـــارسِك
لكن مُستحيل تنطــاقي للمو دارسِــك
الصديق عمر أبو دم عقيــدك وفارسِك

شرِك داسه في لُبَّـــادِك اللـِتلبَّك
مابتنطاقي يوم صَدَفِك نحاسو إتهبَّك
جـقله معزة الرُشرُش عيونه مشَّبك
ناقِد فيك حسن حــامد نواقي دببَّك

أصلو النـاقه صيد ما بتألف المردود
ناجعه تملي بي واسع الخلا الممدود
جقله بسمحه إن إتعطرن المهــدود
بِعِزها ود عويضه أب مسكناً في دود

جقله عزيــــــــزه في معناها
الفتنه البتــاخد سيده كم جايبــاها
أنا شُفتَ أب قدم ما بيرحمه إن لاقاها
لي ضيفانو بِضبَح وديمه دافعو جناها

جقله حدارها عند الفي المحاصات عرضو
كُمــــاجه بِقطِّع الوردان مرارة قرضو
عتيمه بِعــالِج المعلــول يفجِّر مرضو
فرســان الهـواوير تسعه فوقه إنقرضو

يـــــاجقـــله المَسَـــكَّر دَرِك
يوم بترادي وادي البيض ويوم بي غُرِك
غير العمرو ســـايمو وكل يوم مِـدَرِّك
طلَقِك قـــاسي في كبد المُراح من ذَرِّك



يوم تتمنى تسعـــاها وتسيها مراح
ويوم تكره سعايتها وتقول مي صباح
جقله عتيمه بدرياً مع البيـــــاح
وديمه مشامشه للبلد أب سحاباً ساح

جقله صعيد وجقله الغرب وجقله سواكن
وجقله معزة أُم حدساً مطوِّل ســـاكن
جقله ولتَّه ميلان ناس مصر مسَّـــاكِن
حمره وليها طيَّار ريش وخفها مـــاكِن

جقله مكجنه الحـــله ورُباط البيت
ديمه مراده بالحدب أب وحوش بتبيت
جقله عقيده للمطوره ديمه شطــيط
جقله بتجرد البنك إن جــرت مُربيت

جقله عزيزه إن قامت مصر دبوكه
ضاقت بالملايين بيعه جارده بنوكه
جقله إياها عسافة الدمي المسفوكه
جقله صدفها أسود من زراق الدوكه

جقله معزة الدعجه الخصــاله حميده
ضاقت ترعى فايقه وضاق مروِّق سيده
ضاقت داقنت وحدتَّه متل الصـــيده
ضاقت مارقه من ركب المهاجره جريده

ضاقت في مقايطه جــابت العربيه
وضاق إنباع ولدها وخلصوبو الديه
جقله كتير مجاسف بي حمتو هويه
سبب الفتنه زمنـاً في الحكم زنديه

جقله الخير وجفله الشر وجقــله عذاب
وجقله كُماجه للفرســــان قعد ينهاب
سافكه دموم وهالكه ديوش وخاربه خراب
سبب الفتنه بيــــن ودجُقه والنوراب

جقــــله بترتع القش المفرق لوب
مرات نازله مهوى ومره طالعه حدوب
العطـــويه فاتنـــاهم مع ميدوب
سفَّـــاكة دمِي وشاباكه بت أُم قوب

جقله حدارها عند القلبو يابس كو
تلبج ديمه بالقفر أب خلاياً صـو
مراتن تغَر من العـــقيد الضو
ومــراتن تدُر مري في رقعة البو

مراتن تسادر مطبق الجبَّــال
ومراتن تقنجر بالهويد والنال
مراتن تتم الكيف وراحة البال
ومراتن تختو حوار ومره عجال

يــــاجقــــله العقيدك حارص
لبنك كلو مصلح كان حليب كان قارص
رِقِك شم نسام الدعـــاش قام تارس
دايره تعرضي لاحقه إلا نترِك فـارس

جقله بتمرق الإيم إن حلبتها درَّت
وجقله تتمم الكيف إن طلقتها فرًَّت
جقله معزة الدعجه الضميره مخرَّت
جقله بتقطع المحل السنين إن حرَّت

يوماً بي لقيط حنتوت مفرق ســارحه
ويوم من ريح دعاشاً هب بتربِع مارحه
تتم الكيف أكان مصعت تلوبه القـارحه
جقله الفيها بي حظ الفسِل مي مصارحه

يوماً بي لقـــيط حنتوت معاهو شِري
ويوم عانيه البروق مجموعه شاقه الصي
جقــــــله معزة أُم جمراً مولع حي
المــوت فوقه لا أقول ليك ولا تقول لي

تسلم يا ود الشيخ دايما زوقك جميل

تشكر يا حبيب وترقبوا المثير

مشكور ياابوخلود